al-Assad fingið friðskjól í Russlandi

Frákoyrdi sýriski forsetin, Bashar al Assad, hevur saman við familju síni fingið friðskjól í Russlandi.

Tað váttar russiska sendifólkið, Michail Uljanov. 

Sunnunáttina fall stýrið hjá Assad í Sýria, tá ið uppreistrardeildir tóku valdið á m.a. høvuðsstaðnum Damaskus.

- Assad-familjan er í Moskva. Russland svíkir ikki sínar vinir í ringari støðu. Tað er munurin á Russlandi og USA, skrivar Michail Uljanov á miðlinum X.

Uljanov er fasta sendifólkið hjá Russlandi í eysturríkska høvuðsstaðnum Wien.

ST-trygdarráðið hevur kallað inn til fund í kvøld um støðuna í Sýria.

Tað siga diplomatiskar keldur við tíðindastovuna AFP, skrivar Ritzau.

Sambært AFP hevur Russlandi biðið um fundin.

Sýria

(Mynd: Reuters/Ritzau Scanpix)

Vil hava Assad fyri ICC

Kanada vil hava frákoyrda Assad, forseta, fyri altjóða dómstólin í Haag, ICC. 

Tað sigur kanadiski uttanríkisráðharrin Melanie Joy.

- Vit tvíhalda framvegis um at draga stýrið hjá Assad fyri altjóða dómstólin fyri píning og andstyggiliga, ómenniskjaliga og niðrandi viðferð av sýriska fólkinum, sigur hon í skrivligari frágreiðing. 

Longu í juni í fjør fór Kanada saman við Hollandi undir at fyrireika rættarmál í ICC móti Assad-stýrinum fyri atgerðir undir sýriska borgarakrígnum. 

Sýria

(Mynd: Reuters/Ritzau Scanpix)

Ógreitt hvat hendir

Tað er ógreitt, hvat nú fer at henda í Sýria, men sýriski forsætisráðharrin Mohammed al-Jalali hevur mælt til friðarligt valdsskifti. 

Hann sigur eisini, at hann er til reiðar at samstarva við leiðararnar, sum sýriska fólkið velur.

Í ST-trygdarráðnum eru 15 limalond, og av teimum eru fimm fastir limir. 

Russland og USA er tvey av teimum, og tey hava eisini sýtingarrætt til uppskot í ráðnum.

USA lopið á IS-støðir

Amerikanska deildir hava framt 75 álop á IS-støðir í Sýria, sigur amerikanska høvuðsstøðin Centcom við Reuters.

- Vit vilja ikki geva IS fyrimun av støðuni, sum er íkomin í Sýria, sigur Centcom í fráboðan.