Landið fær ov stórt vald á kommunulæknaøkinum

Klaksvikar kommunu dámar einki, at landið skal yvirtaka stórar partar av kommunulæknaøkinum. 

Tað sigur kommunan í hoyringarskrivi um uppskotið um nýggju kommunulæknalógina.

Kommunan sigur stutt og greitt, at líkt er til, at landsumsitingin umvegis landsstýrisfólkið við hesi lógini fer at fáa sera stórt vald á kommunulæknaøkinum.

Løgtingið letur vald frá sær

Men kommunurnar vera í stóran mun avmarkaðar til gjaldandi luttakarar uttan stórvegis ávirkan á skipanina. 

Og løgtingið letur nógv vald frá sær til landsstýrisfólkið.

Sambært lógaruppskotinum skal landið standardisera og keypa øll amboð til kommunulæknarnar og onnur heilsustarvsfólk í heildudeplunum.

Hetta heldur Klaksvíkar kommuna vera skeivt, tí hon av ringum royndum veit, at landsmyndugleikarnir mangan ikki raðfesta økini og tí eru seinir við fígging til ábøtur og nýkeyp.