Vinnunevndin verður nú eisini føst nevnd í Tórshavnar býráð

Tórshavnar býráð samtykti í gjár at lyfta vinnunevndina upp á sama stig sum tær sjey føstu nevndirnar hjá býráðnum.

Men tað var kortini ikki einmælt.

Tróndur Sigurðsson og Kári Johansen atkvøddu ímóti.

Uppskotið var at broyta kommunustýrisskipanina, so vinnunevndin verður føst nevnd.

Samsýningar broytast

Í vinnunevndini eru Heðin Mortensen, Anja Weyhe, Bergur Robert Dam Jensen, Høgni Vilhelmsen og Tróndur Sigurðsson.

Av tí at ein føst nevnd kemur aftrat, mugu ásetingarnar um samsýning til nevndarforfólk broytast. 

Samsýningin minkar úr 7,14 prosentum av borgarstjóralønini niður í 6,25 prosent av borgarstjóralønini. 

Uppskotið skal hava eina viðgerð aftrat í býráðnum.

Heðin í SEV

Tórshavnar býráð staðfesti í gjár, at Heðin Mortensen skal umboða Tórshavnar kommunu í nevndini hjá SEV.

Annita á Fríðriksmørk er tiltakslimur.

Í farna valskeiði umboðaði Kári Johansen Tórshavnar kommunu í nevndini hjá SEV.

Hann var eisini formaður har.

Men nú er Kári Johansen ikki í meirilutanum í Tórshavnar býráði.