Bara eitt prik

Tá tað er trupult hjá sjúkrarøktarfrøðinginum at finna eina æðr at prika í, er mannagongdin í dag, at trý til fýra heilsustarvsfólk skulu royna seg, áðrenn hjálp verður tilkallað.

Hetta ørkymlar sum vera man sjúklingar, sum skulu prikast ofta, og tí fór Lisa Maria Anderssen undir eina granskingarverkætlan við ultraljóði, sum skal hjálpa sjúkrarøktarfrøðingum at raka rætt fyrstu ferð.

- Tá eg skuldi skriva mína B.A. ritgerð, so hugsaði eg, um ikki onkur gransking finst á økinum, sum kann bøta um hetta, og so kom eg í kontakt við ein professara innan ultraljóð, og so fór eg í gongd.
Evnið var so áhugavert, at Lisa avgjørdi at granska víðari, og tað botnaði í hesari verkætlan, har sjúkrarøktarfrøðingar læra at nýta ultraljóð til at finna æðrar, sum annars fjala seg ov væl.

Ein deild á Landssjúkrahúsinum, sum ofta hevur brúk fyri hjálp til at prika er onkologiska ambulatoriið, har krabbasjúklingar koma fyri at fáa kemoterapi.

- Tá sjúklingar hava fingið kemo í longri tíð, skaðar tað æðrarnar hjá teimum, so tær vera truplari at arbeiða við, sigur Joan Mohr Mikkelsen, sjúkrarøktarfrøðingur, og leggur afturat, tað hevur stóran týdning fyri sjúklingarnar, at hetta riggar, tí nógv teirra eru bangin fyri at vera prikað, og at tað fyllir so nógv í teirra huga. Um man veit at tað riggar fyrstu ferð prikað verður, so sleppa sjúklingar undan hesum ampa.

Thordis Reynstind, sjúkrarøktarfrøðingur, minnir eisini á, at tey fólk sum skulu hava kemo, longu eru í einari kreppustøðu áðrenn tey koma, og tá hjálpir tað ikki, um tey einaferð um vikuna skulu stúra um at skula vera stungin fleiri ferðir, tí leitað verður eftir einari æðr.

Hoyr prát við tær tríggjar her