11 fólk doyðu av skotunum í Örebro

Svenska løgreglan hevði fyrrapartin tíðindafund um tilburðin í gjár, har ein 35 ára gamal maður fór at skjóta frá hond á einum skúla í Örebro.

11 fólk lótu lív, og seks fólk vóru særd. Ein av teimum deyðu er gerningsmaðurin.

Tey seks særdu eru øll vaksin fólk. Fýra av teimum vórðu løgd undir skurð alt fyri eitt, og eingin er í lívsvanda.

Roberto Eid Forest, økisleiðari hjá løgregluni í Örebro, segði á fundinum, at kanningararbeiðið er byrjað, men enn er ikki so nógv nýtt at siga.

Roberto Eid Forest

Roberto Eid Forest

Ikki yvirgangur

Tað er framvegis ikki staðfest, um gerningsmaðurin var einsamallur um álopið. Einki bendir á, at álopið í gjár var yvirgangur, men støðan kann broytast, segði Roberto Eid Forest.

Helst er gerningsmaðurin deyður fyri egnari hond, sigur løgreglan.

Á tíðindafundinum var sagt, at tá politiið kom á staðið, hoyrdust framvegis skot, og tað er hugsandi, at tað eisini bleiv skotið eftir løgregluni. Tá hon kom fram á gerningsmannin, var hann deyður.

Roberto Eid Forest hevur heitt á fólk um ikki at breiða óváttaðar søgur út um hendingina, millum annað hvør gerningsmaðurin er.

Barn undir belti

Melinda Sandberg er ein av næmingunum, sum var í skúlanum í Örebro.

Tey vóru júst farin í tíma, tá ið skot hoyrdust. Lærarin bar skjótt at, stongdi hurðina og gav næmingunum boð um at krógva seg. 

Hon sendi unnusta sínum sms-boð um støðuna, og hugsaði annars um barnið, sum hon ber undir belti.

Sí samrøðu, sum svenska kringvarpið gjørdi við Melindu Sandberg: