Ein milliard gav 80 mió. í skatti og gjøldum

Av einari inntøku upp á eina milliard og 50.000 krónur fingu Føroyar 80 milliónir í skatti og arbeiðsmarknaðargjøldum í fjør. Talan er um føroyingar, sum sigla við skipum í altjóða skipaskráum, eitt nú FAS, ella arbeiða á landi uttanlands - føroyingar, sum búgva í Føroyum.

Nógv, sum arbeiða uttanlands, arbeiða eisini í Føroyum, tá tey eru heima. Fyri tær inntøkurnar, 150 mió. kr., fingu landið og komunurnar millum 70 og 80 milliónir í fjør. Samanumtikið góvu ein milliard og 200 milliónir krónur góðar 160 milliónir í landskassan og kassarnar hjá kommununum, ALS, Samhaldsfasta og Barsilsskipanini í fjør, sambært tølum hjá Fíggjarmálaráðnum.

800 mió. kr.

Men, leggur Fíggjarmálaráðið afturat, so verður mett, at landið fær 175 mió. kr. í avgjøldum frá føroyingum, sum arbeiða uttanlands. Og so tað, sum kemur undir avleiddar inntøkur. Eftir goldnan útlendskan skatt og endurgjald til FAS-reiðarí, koma 800 mió. kr. inn í føroyska búskapin.

Tær skapa økt virksemi í føroyska samfelagnum og tá eisini øktar skatta- og avgjaldsinntøkur til land og kommunur. Men ongar metingar eru, sum siga, hvussu nógvar pengar, her er talan um. Í fjør arbeiddu 422 føroyingar, sum búgva í Føroyum, í øðrum londum. Nógv tey flestu, 276, arbeiða í Norra. Harafturat sigla nógvir føroyingar við útlendskum skipum.

Nógv fólk útlendskum skipaskráum

Í fjør vóru 179 føroyingar við norskum fiskiskipum. Men nógv fleiri eru við skipum í altjóða skipaskráum. 709 føroyingar vóru við skipum í FAS, sum er føroyska skipaskráin, 353 vóru í DIS, sum er danska skráin, og 365 í NIS og NOR, sum eru norsku skipaskráirnar. Nógv útlendsk skip eru komin í FAS seinastu árini, og í fjør vóru 1373 útlendingar við FAS-skipum.

Tølini eru í svarinum hjá Jørgeni Niclasen, landsstýrismanni í fíggjarmálum, til Reimund Langgaard, løgtingsmann, sum spurdi um føroyingar, sum arbeiða í øðrum londum. Tingmaðurin spurdi eisini um løn og skatt hjá hesum fólkunum. Inntøkan var 600 milliónir hjá sjófólkunum í FAS, DIS og NIS og NOR.

Reiðaríini 187 mió. úr landskassanum

Tey, sum arbeiða í landi í Norra, fingu 87 milliónir í løn í fjør. Reiðaríini í FAS fingu 187 milliónir úr landskassanum í fjør. Hetta var skatturin hjá føroyingum og útlendingum, sum eru við FAS-skipum.