Kringvarpið endurnýggjar rættindini til góðu, gomlu Mumi-røðina

Flestøll kenna gomlu Mumi-framleiðsluna frá 1990unum, sum var send í sjónvarpinum í nógv ár.

Hósdagin 13. mars kunnu børn í Føroyum hyggja at væl umtóktu familjurøðini í nýggjari góðsku í VIT-appini, tí Kringvarpið hevur endurnýggjað rættindini til teir 47 partarnar, sum vóru framleiddir á føroyskum á sinni. Frameftir verður eisini ein Mumi-partur sendur í barnaløtuni hvørt hóskvøld.

Mumi

Á barnaøkinum í Kringvarpinum verður stórur dentur lagdur á at framleiða gott, føroyskt tilfar til børn:

Útlendskt tilfar gerst alsamt meira dominerandi og hevur ávirkan á m.a. málið, so tað er okkara ábyrgd at tryggja, at føroysk børn hava atgongd til dygdargott føroyskt tilfar, sigur Barbara Samuelsen, leiðari á Mentanardeildini í Kringvarpinum. Sum public service-stovnur hava vit eina skyldu til at gera føroyskt barnatilfar lættari atkomuligt, og nú hava vit eisini ein meira tíðarhóskandi pall til børnini, nevniliga VIT-appina, heldur hon fram.

Mumi er millum best umtóktu barnarøðir í heiminum

Mumi-røðin er bygd á bøkurnar og teknirøðirnar hjá Tove Jansson um forvitna og hjartagóða Mumitrøllið og familju og vinfólk hansara – eitt nú Lítla Mý, Hemilin, Mumrikur, Snoddi og Stinki. 

Og Mumi er ikki bara væl dámd í Føroyum. Um allan heimin eru teknirøðir, teknifilmar, fjepparavørur, leikur og enntá tivoli gjørd burtur úr teimum 9 skaldsøgunum hjá Tove Jansson.

Upprunaliga er røðin japansk-finsk-hollendsk framleidd. Hon gjørdist sera væl umtókt bæði í Finnlandi og altjóða og varð sýnd í fleiri enn 100 londum. Røðin var stórt frambrot fyri Mumi-heimin uttan fyri Finnland og var við til at gera figurarnar enn meira ikoniskar. 

Mumi

Betri mynda- og ljóðgóðska

Framleiðslufelagið Kindernet Entertainment OY eigur rættindini til røðina, og í studio teirra í Finnlandi er mynda- og ljóðgóðska betrað. Nýggja mynda- og ljóðgóðskan merkir, at litirnir eru klárari, myndirnar týðiligari og ljóðið betrað, so upplivingin verður enn betri enn áður.

Børn í Føroyum kunnu sostatt gleða seg til at fylgja við í Mumidalinum frá komandi hósdegi – við betri góðsku og á føroyskum, júst sum vit minnast hana.