Allarhelst asbest í takinum á Miðstovninum

Í gjár kom kunning frá Tórshavnar kommunu til foreldrini, sum hava børn á Miðstovninum í Havn - Gamla Realskúlan, at tekjan á stovninum kann hava asbest í sær. Fyri at fáa staðfest, hvørt takið á stovninum inniheldur asbest ella ikki, so hevur bygningsdeildin hjá Tórshavnar kommunu sent eina roynd til Teknologisk Institutt í Danmark.  Filip Jónson Eliasen er talsfólk í foreldraráðnum fyri dagstovnin, og tey eru ikki stúrin um støðuna. 

Kringvarpið veit um eina familju, sum hevur tikið sítt barn úr Miðstovninum, tí barnið hevði andadráttstrupulleikar, og tey fara nú at lata barnið kannast. 

Deildarleiðarin fyri bygningsdeildina í Tórshavnar kommunu er ikki tøkur til samrøðu í dag, men í kunningarskrivi til foreldrini, sum hava børn á Miðstovinum, so stendur, at takið undir øllum umstøðum skal skiftast í summar, og at hetta arbeiðið verður lagt til rættis sambært strongum reglum um handfaring av asbest, soleiðis at støv ikki spjaðist í umhvørvinum uttanfyri, ella á loftinum undir tekjuni.