Varðhaldið og Kriminalforsorgin løgd saman

Varðhaldið í Mjørkadali og Kriminalforsorgin í Havn eru løgd saman, og hava nú felags leiðslu. Samanleggingin er eitt úrslit av, at Kriminalforsorgin her - eins og í Danmark - verður skipað av nýggjum.

- Endamálið er at skapa betri samstarv um felags viðskiftafólk, sum annaðhvørt sita í Varðhaldinum ella Kriminalforsorgin hevur undir eftirliti, og at samansjóða fakligu førleikarnar hjá starvsfólkunum á báðum stovnum.

- Tað verður gjørt, soleiðis at viðskiftafólkini hjá Kriminalforsorgini fáa eina samanhangandi tænastu, sigur Kriminalforsorgin.

Stjóri fyri báðar stovnarnar

Elkin Klettheyggj, sum higartil hevur verið leiðari á Kriminalforsorgardeildini, er sett sum fyribils stjóri fyri báðar stovnarnar. Hennara uppgáva verður at standa fyri nýskipanararbeiðinum.

Dagligu leiðsluna fyri Varðhaldinum í Mjørkadali og Kriminalforsorgardeildini í Havn fara Anna D. Háberg, yvirvaktmeistari, og Eliesar E. Jacobsen, forsorgarfulltrúi, at hava.

Arbeiðið við nýskipanini byrjaði 1. november, og skal eftir ætlan verða liðugt 1. juli.