SÍ vann fyrstu FM-finaluna

Høllin á Giljanesi (Polestar-deildin, 1. FM-finalan)

SÍ – Mjølnir 3-1 (25-23, 13-25, 25-23, 26-24)

Eftir at SÍ hevði vunnið fyrsta sett 25-23, tók Mjølnir yvir og mestsum flongdi SÍ í 2. setti, har serliga Phil Freere var flúgvandi.

Mjølnir var eisini omaná í 3. setti og legði seg á odda 19-15, 22-17 og 23-18. Men SÍ kom afturíaftur sum eitt óløgi, og við høgum servitrýsti frá Mileta Vesovic vann SÍ tað, sum eftir var, og settið 25-23, skrivar Flogbóltssamband Føroya. 

Gongdin var tann sama í 4. setti, har Mjølnir var á odda 23-19, men SÍ javnaði til 23-23. Mjølnir fekk tó settbólt, men SÍ hóraði undan og vann ístaðin settið 26-24 og dystin 3-1.

Fríggjakvøldið kl. 19:30 verður onnur finalan spæld í Badmintonhøllini í Klaksvík. Vinnur SÍ tá, er SÍ føroyameistari. Vinnur Mjølnir, sama hvat settúrslitini eru, verður ein triðja og avgerandi finala spæld á Giljanesi.