Bjarginartrol vann FirstLegoLeague

Eitt trol at bjarga tingum í stormi vann árligu FirstLegoLeague-kappingina, sum leygardagin varð fyriskipað í Føroya Tele-bygninginum í Hoyvík.

Evnið var Náttúruvanlukkur, og liðið "Legoholics", sum liðið úr Skúlanum á Argjahamri kallaðist, hevði funnið upp á eitt trol, sum tey kallaðu Netembraser.

Í stuttum kann sigast um hetta trol, at tað kann skjótast upp um eini hús og sostatt binda alt fast í einum, tá stormur leikar á.

Fýra lið høvdu meldað til. Eitt úr Skúlanum við Løgmannabreyt, eitt úr Skúlanum við Løkin í Runavík og eitt úr Skála skúla.

Við sigrinum sleppa næmingarnir úr 7.b. í Skúlanum á Argjahamri um tríggjar vikur til Bodø í Noregi at kappast móti liðum úr hinum Norðurlondunum.

Kelda: in.fo