Tveir játta seg partvís sekar

Eitt av stóru rúsevnismálunum er fyri í Føroya rætti hesa vikuna. 

Seks menn, allir danir, eru ákærdir fyri at hava smuglað 18 kilo av hassji og 800 gramm av hassjolju til Føroya í fjør heyst við tí endamáli at selja hassjið í Føroyum.

Hassjolja er nógv sterkari enn onnur evni, sum eru gjørd úr kannabisi.

Í oljuni eru 90 prosent THC. Í øðrum, sum er gjørt úr kannabisi, eru í miðal 12 prosent THC.  

Ein teirra ákærdu kom til Føroya við hassjinum í bátinum Emelie úr Danmark.

Báturin legði at á Sandi.

Tveir aðrir, sum eru ákærdir, gróvu hassjið niður í haganum oman fyri omankoyringina til Kirkjubøar.

Teir vóru tiknir á bóli á staðnum.

Royndu at hvítvaska 1,3 milliónir krónur

Menninir eru eisini ákærdir fyri at royna at hvítvaska 1,3 mió. kr.

Tveir teirra vóru tiknir, tá teir koyrdu um borð á Norrønu 17. oktober í fjør.

Tollarar funnu pengarnar, 1,3 mió. kr., í holrúmum í bili teirra.

Teir skuldu til Danmarkar.

Politiið sigur, at pengarnir stava frá ólógligum virksemi.