Hátíðarhalda tjóðardag Ísraels á Vaglinum

Í dag er 14. mai, sum er tjóðardagur Ísraels. Men tað er ikki bara í Ísrael, at dagurin verður hildin, tí eisini á Vaglinum í Havn hittast fólk at hátíðarhalda dagin. Tað eru Vinafelagið Føroyar-Ísrael og átrúnaðarligi felagsskapurin, ICEJ Føroyar, sum standa fyri tiltakinum. Tað er ikki fyrstu ferð, at ísraelski tjóðardagurin verður hátíðarhildin í Føroyum. Í eini fimtan ár hevur Vinafelagið Føroyar-Ísrael verið við til at skipa fyri tiltøkum á degnum. 

Jákup S. Joensen, formaður í Vinafelagnum Føroyar-Ísrael, heldur, at tað er umráðandi at hátíðarhalda dagin. Hann vísir á, at jødiska fólkið hevur verið fyri hatri søguliga, og vil hann gjarna vera við at fagnast at tey nú hava eitt land, har tey kunnu liva og virka í einum fólkaræði.