Politiskur viðmerkjari: Einki nýtt undir sólini

Tíðindafundurin, sum føroyski løgmaðurin, danski forsætisráðharrin og grønlendski landstýrisformaðurin hildu í Tinganesi týsdagin, var lutfalsliga stuttur.

Spyrst tú Beintu Løwe, journalist, samfelagsfrøðing og fyrrverandi løgtingslim, so var heldur ikki nakað nýtt undir sólini.

 - Vit hoyrdu tað, sum vit hava hoyrt endurtikið. At Føroyar vilja hava fleiri heimildir. So har var einki nýtt, sigur Beinta Løwe.

Ein orsøk til tess kann vera, at so stutt tíð er liðin, síðani stjórnarleiðararnir hittust seinast.

Ein onnur orsøk kann vera, at tey treyðugt vilja siga nakað ítøkiligt um heimildirnar, fyrrenn sonevnda grein 4 nevndin, sum skal kanna, hvørjar heimildir kunnu yvirtakast innanfyri verandi karmar, kemur við síni niðurstøðu í heyst.