Netanyahu lovar hevnd fyri iranskt álop á ísraelskt sjúkrahús

Ísraelski forsætisráðharrin, Benjamin Netanyahu, lovar hevnd eftir iransku álopini í nátt, sum millum annað raktu sjúkrahúsið Soroka í Beersheba har suðuri í Ísrael. 

Á sosiala miðlinum x, skrivar hann at "iransku yvirgangs-bølmennini" skulu rinda fullan prís fyri síni álop á sjúkrahús og sivilar ísraelar. 

Miðlar í Ísrael boða í morgun frá umfatandi rakettálopum á landið.

Ísraelsk álop hava eisini verið á Iran í nátt, skrivar danska kringvarpið

Tað eru seks dagar síðani Ísrael leyp á Iran.

Benjamin Netanyahu

Benjamin Netanyahu. (Mynd: AFP/Ritzau Scanpix)

USA fyrireikar seg

USA fyrireikar seg til møguliga at fara upp í kríggið saman við Ísrael.

Amerikanski forsetin vildi tó ikki siga, hvat USA ætlar í gjár. 

- Kanska geri eg tað - kanska ikki, eingin veit, hvat eg fari at gera, segði Donald Trump við miðlarnar í gjár.

Hann legði aftrat, at USA veit, hvar "sokallaði ovasti iranski leiðarin" heldur til, sum hann málber seg, men at hann ongar ætlanir hevur um at taka hann av døgum - í øllum førum ikki í løtuni. 

Ali Khamenei ayatollah, Iran

Ali Khamenei, ayatollah. (Mynd: Reuters/Ritzau Scanpix)

Óbótaligur skaði

- Loypur USA á, ger tað óbótaligan skaða á viðurskftini landanna millum. Tað eigur USA at vita, sigur iranski leiðarin, Ayatollah Ali Khamenei, við iranskar miðlar sambært Reuters.

Hann leggur dent á, at Iran hevur ongar ætlanir um at gevast.

Iranski sendimaðurin í ST sigur, at loypur USA á Iran, verða amerikanarar næsta mál hjá Iran.

Í minsta lagi 24 ísraelar og 224 iranar eru deyðir, síðani Ísrael leyp á Iran fríggjadagin, skrivar danska kringvarpið.