Bústaðir steðgar nú á við verkætlanum

- Vit mugu hugsa um, hvat leiguprísurin verður, sigur Jógvan Ósá, stjóri í Bústøðum, sum nú bara hevur tvær verkætlanir eftir at arbeiða við.

Bústaðir staðfestir tað enn einaferð í nýggjastu ársfrágreiðingini - at framvegis er stórur eftirspurningur eftir leigubústøðum:

Men meðan Jógvan Ósá í ársfrágreiðingini fyri 2024 skrivar, at vegna stóra eftirspurningin verður arbeitt við nýggjum verkætlanum, sum eftir ætlan byrja í seinnu helvt av 2025, so er veruleikin í dag ein annar. 

Prísurin er ov høgur í tveimum verkætlanum, og farið verður ikki víðari við hesum báðum verkætlanum.

Bara tvær verkætlanir

Nú arbeiðir Bústaðir bara við tveimum verkætlanum. At gera Eiragarð um til lestraríbúðir og eini byggiverkætlan á Argjahamri. 

Samstundis sum Bústaðir roynir at fáa ferð á íbúðarbygging á Argjahamri, og bíðar eftir at politiska ætlanin at gera Eirargarð-2 til lestaríbúðir kemur ígjøgnum teknisku og fyrisitingarligu avbjóðingarnar á vegnum - so stendur stovnurin við 44 íbúðum við Dalavegin í Havn, sum skulu seljast sum lutaíbúðir fyri harvið at útvega Bústøðum pengar til at byggja okkurt annað fyri.

Men higartil eru bara fýra seldar.