Kanna nú politiskar avgerðir, sum hava havt avleiðingar fyri Grønland

Kanningin, ella frágreiðingin, sum skal staðfesta allar politiskar avgerðir og hendingar, sum hava havt avleiðingar fyri Grønland, byrjar nú.

Tað sigur lærdi haskúlin í Grønlandi í tíðindaskrivi.

Avgerðin um kanningina var tikin í juni í 2022.

Kannast skulu viðurskiftini millum Grønland og Danmark frá øðrum heimsbardagi til nú, seinastu 80 árini.

Millum annað skulu avgerðir hjá donskum politikarum, sum hava havt avleiðingar fyri grønlendingar, kannast.

Fimm ár eru sett av til at gera kanningarnar og frágreiðingina.

Tenna Jensen

Tenna Jensen. (Mynd: KNR)

Kostar 45 milliónir

Danska stjórnin fíggjar hana. 45 milliónir krónur eru játtaðar. 

Kanningarleiðarin skal hava tilknýti til lærda háskúlan í Grønlandi.

Tenna Jensen og Daniel Thorleifsen eru kanningarleiðarar.

Annars skulu grønlendskir og danskir granskarar vera við, og grønlendska fólkið skal spyrjast.  

Granskararnir skulu ferðast í Grønlandi og tosa við fólk.