Skiftið: Vælkomin heim

Skiftið er poddrøð í 9 pørtum um skiftisárini hjá kvinnum. Tíðin, sum kann vera buldraslig og kaotisk hjá nógvum kvinnum. Vit tosa við serfrøðingar, og føroyskar kvinnur siga frá sínum hugsanum og upplivingum við skiftisárum.

Triði partur er í útvarpinum í dag klokkan 17.05 og eitur 'Vælkomin heim'. Tú finnur allar partarnar í røðini her. 

Kvinna, vælkomin heim

Tað eru ikki bert vansar, sum fylgja við skiftisárum, tí nógvar kvinnur fáa eyka dirvi til at siga sína hugsan og liva lívið, soleiðis sum teimum hóvar best. Tíðin, har børnini fóru við bróðurpartinum av orku og innihaldi er av, og tolið við roksi og uttanumtosi er uppi.

Vælkomin til the age of no bullshit.

- Tá vit eru smágentur og gentur eru vit rættiliga kompromisleysar, og vit hugsa ikki so nógv um tað, onnur siga og halda, sigur Marianna Vang Simonsen, sum í longri tíð hevur undirvíst kvinnum í skiftisárum. Hon heldur fram við at greiða frá árunum, har vit handla út frá tí, sum onnur halda, at vit skulu gera, fyri síðan í skiftisárum at koma aftur til hesa smágentuna, sum legði líka í, hvat onnur hildu og søgdu.

Umsorganarhormonið, sum hevur elvt kvinnum til at taka sær av øðrum, dalar nú í kroppinum, og kvinnan byrjar at hyggja at sær sjálvari og sínum lívi aftur.

Skiftisárini eru eitt paradoks

Broytingar henda í kvinnukroppinum og -heilanum, og orkan kann fara at bila, tí hormonbroytingarnar krevja ómetaliga nógv:

- Tað krevur nógva orku at fara frá at vera fertil til ikki at vera fertil longur. Eins nógva orku, sum tað kravdi at fara frá at vera ikki fertil til at vera fertil.

Tey flestu vita, hvussu nógv tannáringar sova í broytingartíðini, sum puberteturin er, og Marianna minnir á, at vit eisini mugu geva okkum sjálvum ta hvíld og umsorgan, skiftisárini krevja, tí broytingarnar eru eins umfatandi og hjá tannáringunum. 

- Hevur tú brúk fyri at fáa tær ein lúr, jamen so legg teg eina løtu, líkamikið, hvat onnur siga um tað, leggur hon afturat.

Urd Johannesen, Jana Mortensen og Kristina Gry Berg eru í panelinum, sum hugleiðir um tað, sum Marianna segði, og tær kenna seg aftur í tí, sum Marianna sigur um broytingina, sum merkist bæði í kroppi og sinni.

Tað er eitt paradoks, at kvinnur koma heim aftur til sín sjálvs, samstundis sum tað kennist sum ókent land, tí tú hevur nú tíð til at taka tær betri av tær sjálvari, samstundis sum flýggjandi hormonirnar skapa ruðuleika í lyndi, sinnalagi og likami.

skiftid_3.png

Hvat: Skiftið
Hvar: Í útvarpinum og á KVF Ljóð
Nær: Týsdagar kl. 17.05, og tá tað passar tær á KVF Ljóð