Spæla seint og skapa ov lítið

 - Vit gera tað nokkso trupult fyri okkum sjálvar. Vit spæla seint. Vit koma fram til nakrar góðar møguleikar, og taka ikki av, men vit skapa heldur ikki nóg nógvar møguleikar.

Tað segði Sanna Svarvadal eftir at KÍ hevði tapt 1-0 fyri HB í steypafinaluni á Tórsvølli leygarkvøldið. 

Rúna Jacobsen skoraði einasta málið í dystinum, tá ein lítil hálvur tími var spældur, og hóast KÍ royndi, eydnaðist ikki at javna.

 - Vit høvdu kunnað verið meir ágangandi, og í nógvum eru tær eitt fet frammanfyri, viðgekk KÍ-liðskiparin, sum nú fer at gera alt fyri at føroyameistaraheitið endar í Klaksvík.

 - Hetta er blóð upp á tonnina til at koyra á tann næsta dystin og vónandi tryggja FM áðrenn síðsta umfar, segði Sanna Svarvadal.