Snyrilsmálið: Kvinnur kunnu nú søkja um endurgjald

Í næsta mánaði kunnu kvinnur í Grønlandi, sum fingu snyril í 1992, ella eftir tað, søkja um endurgjald, veit KNR at siga.

Grønland yvirtók heilsuverkið í 1992.

Tær kunnu søkja, hóast frágreiðingin hjá grønlendska landsstýrinum um málið ikki verður liðug fyrr enn í januar næsta ár.

4,5 milliónir

Fýra og ein hálv millión krónur er sett av til endurgjaldið.

Landslæknaembætið í Grønlandi visti fyri einum mánaði síðani um 15 tilburðir eftir 1992.

Enn er ikki greitt, um kvinnurnar, sum fingu snyril til og við 1991, fáa endurgjald úr Danmark.

Tær eru í minsta lagi 4.000 kvinnur.