Betesda: Gáttin er vorðin lægri og sosiali týdningurin er stórur

Á sumri í 2012 vóru Marita Norðberg Sivertsen og Dagny Tróndheim millum stigtakararnir til eina morgunkafe í Betesda klokkan 10. Fyrsta summarið var opið hvønn dag, og síðani hevur verið opið hósdagar frá klokkan 10 til 12.

Fólkini, ið støkka inn á gólvið, eru í stóran mun pensjonistar, men yngri fólk vitja eisini, eins og tað ofta kemur fyri at vitjandi koma aðrastaðni frá. Og tað eru ikki bara fólk úr brøðrasamkomuni, ið vitja.

Á skránni eru bæði breyð, bollar, køkur og frukt, eins og livandi tónleikur.

Í hesum innslagnum tosa vit Maritu Norðberg Sivertsen og Dagny Tróndheim, sum tóku stig til kafeina, samstundis sum tær eisini lótu samkomuni góð hugskot, tá nýggja Betesda, sum varð tikið í nýtslu í 2014, varð bygt.

Vit hittu eisini Jón Absalon Østerø, sum sang og spældi, eins og vit eisini tosaðu við Maluna Østerø, Finnur Hvidbro, Kristbjørn Olsen, Jákup Christiansen, Omi Joensen, Hervør Joensen, Sigrid Simonsen, Jenny Mørkøre, Jørund Hansen, Poul Færø, Anniku Heinesen og Henny Olsen.

Og eitt, sum gongur aftur, tá tosað verður við fólk, er at morgunkafein í Betesda hevur stóran týdning fyri sosiala lívið. Eisini hava aðrar samkomur um landið síðani tikið hendan táttin uppi.

Tú kanst hoyra morgunreportaguna úr Betesda her!