Fjallmenninir hava tað eftir umstøðunum gott

Klokkan trý korter til tíggju fyrrapartin settu tyrlan hjá Atlantsflogi seg á flogvøllinum í Vágum.

Við vóru teir fimm fjallmenninir, sum í nátt hava verið veðurfastir í Miðvágsurð, millum Slættanes og Víkar.

Ein teirra, sum var við, men sum ikki heldur seg til at gera samrøðu við Kringvarpið nú, sigur, at hóast teir vóru bæði kaldir og vátir, var ongantíð beinleiðis vandi á ferð.

- Vit hava ikki sovið í nátt, men lógu í fjøruni millum nakrar steinar fyri at halda hitanum, tí einki var at kroka í.

Vóru eftir seyði

Teir fimm menninir vóru eftir seyði í gjárkvøldið.

Men tá teir skuldu fara haðani, var veðrið versnað so nógv, at teir sluppu ikki í bátin.

- Tað gekk illa at fáa hendur á seyðinum. So tað seint, og mykrur kom á.  Tá veðrið so eisini versnaði, vildu vit ikki taka nøkur óráð fyri og fara í bátin, sigur fjallmaðurin, sum vit hava tosað við.

Hava tað gott eftir umstøðunum

- Vit vóru ikki beinleiðis bangnir, men tyrlan kom ikki í gjárkvøldið, og vit stúrdu fyri, at hon heldur ikki fór at koma eftir okkum í dag, sigur hann.

Maðurin bar seg undan at gera samrøðu, men sigur, at teir allir hava tað gott eftir umstøðunum.

Veðrið var so ófantaligt, at tyrlan ikki fekk tikið menninar, men teir fingu mat og klæði og sendara frá Rescue Sverra í gjárkvøldið.

Har er so bratt, at ikki er gangandi upp á slætt.