Niðurlæsingin í USA rakar nú eisini flogferðsluna

Endar niðurlæsingin av teimum almennu skipanunum í USA ikki nú, fer flogferðslan at minka við í minsta lagi tíggju prosentum.

Amerikanski ferðslumálaráðharrin, Sean Duffy, sigur sambært bretska kringvarpinum, at frá í morgin verður talan um at minka ferðingina munandi í 40 stórum floghavnum um alt landið.

Avgerðin er tikin, tí eftirlitsfólk á flogvøllum hava boðað frá, at tey eru ovbyrjað, hevur leiðarin í Flogumsitingini boðað Duffy frá í gjár.

- Hetta er óvanligt, eins og niðurlæsingin er óvanlig, og tað er eisini óvanligt, at eftirlitsfólk okkara ikki hava fingið løn í ein mánað, segði flogumsitingarleiðarin, Bryan Bedford, sambært BBC.

Nógv eru sjúk

Meðan niðurlæsingin hevur verið, hava eftirlitsfólk á amerikonskum flogvøllum noyðst at arbeiða uttan at fáa løn. Og tað hevur millum annað havt við sær nógvar sjúkraskrivingar, skrivar BBC:

Niðurlæsingin er tann drúgvasta nakrantíð í amerikanskari søgu, hon hevur vart í 36 dagar.

Um ársskiftið 2018/19 var almenna USA læst niður í 35 dagar.

Tá vóru tað tó bert partar av umsitingini, sum vórðu stongdir. Nú er meginparturin av amerikonsku, almennu fyrisitingini stongdur.

Demokratarnir og republikanararnir hava ikki kunnað samst um nýggja fíggjarlóg. Og avleiðingin er, at játtanir til statin ganga út. Og tí virkar stórur partur av samveldisskipanunum ikki.