Aðalráðið vigar framvegis strandferðslustjóran

Stjórin á Strandferðsluni verður framvegis vigaður av Fiskivinnu- og samferðslumálaráðnum.

Ráðið viðger tvey mál móti Niels Juel Arge. 

Aðalstjórin hevur ongar viðmerkingar, meðan málini verða viðgjørd.

- Málið gongur sína gongd. Samskifti er millum partarnar.

Tað er tað einasta, sum fæst burtur úr pørtunum, tá vit spyrja um tey bæði málini, sum eitt aðalráð hevur sett í gongd móti einum almennum stjóra undir ráðnum.

Galaxy

Hekkuportrið á Galaxy

Fyrra málið snýr seg um, hvussu Strandferðslan handfór málið, tá stovnurin fekk fráboðan um, at avloysaraskipið Galaxy hevði siglt við opnum hekkuportri á opnum havi, 1.september.

Fiskivinnu- og samferðslumálaráðið hevur biðið advokatin, Gunn Ellefsen, gera eina kanning, sum skal vera liðug í desember.

Endamálið við kanningini er at fáa lýst fyrisitingarligu viðgerðina hjá Strandferðsluni av fráboðanini um, at hekkuportrið á Galaxy var opið undir sigling, at meta um, hvørt fyrisitingarliga viðgerðin hjá Strandferðsluni av málinum var nøktandi, og/ella hvørt mett verður, at tørvur er á at styrkja mannagongdir, samskifti ella annað í fyrisitingarligu viðgerðini hjá Strandferðsluni av slíkum málum í framtíðini.

Tann kanningin skal sum nevnt vera liðug í desember.

Smyril, Strandferðslan

Frítekst tagging: 

Smyril

Strandferðslan

Bjarni Árting Rubeksen

Tolling á Smyrli

Hitt málið snýr seg um vøru umborð á Smyrli, sum ikki varð tollað á rættan hátt, tá Smyril kom aftur til landið 13. oktober. 

Aðalráðið heldur ikki, at strandferðslustjórin hevur útint starv sítt á nøktandi hátt.

Tí fór ráðið fríggjadagin 24. oktober undir tilgongd, sum kann fáa starvsrættarligar avleiðingar fyri Niels Juel Arge.

Týsdagin 28. oktober var fundur millum aðalstjóran í Fiskivinnu- og samferðslumálaráðnum og stjóran á Strandferðsluni. Báðir partar høvdu advokat við sær á fund, ávíkavist Gunn Ellefsen og Christian Andreasen.

Elin Mortensen, aðalstjóri, hevur í dag ongar viðmerkingar. Ikki annað enn at málini ganga sína gongd. 

Tað hevur ikki eydnast okkum at fáa fatur á Niels Juel Arge. Men strandferðslustjórin er tó framvegis til arbeiðis, verður okkum upplýst.

Einasta viðmerking frá advokati hansara, Christian Andreasen, er, at samskifti er millum partarnar.