Eggjar grønlendingum til at stovna og reka virki

Vinnuskatturin skal endurskoðast, so fleiri fáa hug at stovna og reka virki í Grønlandi.

Tað segði Jens-Frederik Nielsen, landsstýrisformaður, í nýggjársrøðu sínari.

Hann legði eisini dent á ferðavinnu og fiskivinnu. 

Ferðavinnan mennist nógv og skjótt, og fiskivinnan er ryggurin í grønlendska búskapinum, segði landsstýrisformaðurin, sum hevur góðar vónir um nýggja árið.

Hann heldur, at Grønland kann gerast sjálvstøðugt. Men fyrst skal haldgott grundarlag gerast.

Og tí arbeiðir ein serlig nevnd, sum eitur grein 21-nevndin, við at orða.

Í samrøðu við KNR útilokar Jens-Frederik Nielsen ikki, at hann fer at hitta Donald Trump.