Mjølnir fer undan Fleyr í kappingini um finalupláss

Við 3-2 sigri á Fleyr um vikuskiftið økti Mjølnir um munin millum liðini, og nú er lítil ivi um, at klaksvíksliðið skal spæla FM-finalur ímóti SÍ í ár

Kvinnurnar hjá Mjølni eru í stórformi í løtuni. Tær hava vunnið átta dystir á rað í landskappingini.

Mynd: Mjølnir

Símun Christian Olsen

05.01.2026 - 09:43

Lítil ivi er nú um, at Mjølnir skal spæla FM-finalur ímóti SÍ í ár.

Klaksvíksliðið vann 3-2 á Fleyr sunnudagin, og nú er munurin millum Mjølnir á 2. plássi og Fleyr á 3. plássi seks stig.

Fleyr hevur fimm dystir eftir at spæla, meðan Mjølnir hevur seks dystir, og ilt er at ímynda sær, at klaksvíkingar, sum hava vunnið átta dystir á rað, missa eina somikið stóra leiðslu.

SÍ, sum vann 3-0 á Drátti í grannauppgerðini í Vágum, er framvegis fremst í Hotel Djurhuus-deildini. Sørvingar hava 28 stig - seks meir enn Mjølnir - men hava spælt tveir dystir meir.

Næsta vikuskiftið bresta oddaliðini saman í Sørvági.