Dregur út at kanna SSL og hekkuportrið á Galaxy

Tað dregur út at kanna fyrisitingarligu viðgerðina hjá Strandferðsluni í málinum um Galaxy.

Í oktober í fjør boðaði táverandi landsstýrismaður í samferðslumálum frá, at hann vildi málið kannað. 

Tað gjørdi Jóhan Christiansen, tá maðurin, sum tók myndina av opna hekkuportrinum á Galaxy, alment boðaði frá, at hann hevði tikið myndina, sum Strandferðslan í fyrstu atløgu ikki vildi kennast við. 

Gunn Ellefsen

Gunn Ellefsen.

Ikki liðugt fyrr enn í februar
 
Gunn Ellefsen, advokatur, var biðin um at lýsa fyrisitingarligu viðgerðina hjá Strandferðsluni av fráboðanini um, at hekkuportrið á Galaxy var opið undir sigling. 

Kanningin skuldi vera liðug í desember í fjør. Men hon verður ikki liðug fyrr enn í fyrsta lagi í februar.

Tað upplýsir Bjarni Askham Bjarnason, aðalstjóri í Fíggjarmálaráðnum, sum eftir umskipanina av landsstýrinum og aðalráðunum í desember nú umsitur samferðslumál. 

Eingin grundgeving er fyri, hví tað dregur út at fáa frágreiðingina lidna - annað enn at arbeiðið tekur longri tíð, enn roknað varð við.