Iran fer at svara USA aftur við hermegi

Leypa amerikanarar á Iran, svarar Iran skjótt aftur við hermegi.

Iran er til reiðar at søkja at amerikonskum flogberum og herstøðum í økinum, sigur iranski brigadugeneralurin, Mohammad Akraminia, við almennu iransku sjónvarpsrásina sambært tíðindastovuni AFP.

Fráboðanin kemur eftir at amerikanski forsetin, Donald Trump, mikudagin hótti Iran við álopi, um landið ikki kemur aftur til samráðingarborðið í sambandi við at gera eina kjarnorkuavtalu.

Donald Trump hevur fyrr hótt Iran við álopi, tí iranska prestastýrið hevur dripið mótmælisfólk í sambandi við mongu mótmælini, sum hava verið í landinum síðani síðst í desember.