Jana og tær annan armin í fjórðingsfinalunum

Í gjár varð Jana Mittún kosin Ítróttanavnið 2025 á Ítróttafagnaðinum hjá ÍSF í Varpinum í Klaksvík.

Hondbóltsspælarin hevur havt eitt flott ár í Viborg, har hon nú telist millum týðandi spælararnar, og ikki minst á landsliðnum, sum spældi seg í miðumfarið til HM-endaspælið í vetur.

Hoyvíkingurin var ikki til staðar í Varpinum í gjárkvøldið, og mátti takka fyri heiðurin umvegis telefonina (sí niðanfyri), tí í dag skuldi hon spæla týðandi European League-dyst ímóti Corona Brosov í Rumenia. 

Tað gekk upp á stás, tí við 34-28 sigri á útivølli hevur Viborg spælt seg í sera góða støðu í bólki D, og nú tveir dystir eru eftir, bendir alt á, at Jana Mittún skal royna seg í fjórðingsfinalunum í næststerkastu evropeisku kappingini hjá EHF.

Viborg er nevniliga á 2. plássið við seks stigum - eitt aftanfyri Bourgogne Dijon, men trý stig frammanfyri Corona Brasov. Í næstseinasta dystinum kemur botnliðið Zaglebie Lubin á vitjan í Viborg, har eitt ella tvey stig eru nóg mikið til at tryggjað fjórðingsfinaluplássið.

Jana Mittún skeyt trý mál upp á fimm skotroyndir og legði upp til fýra.