Sleppur ikki at gera rørportur í Haldórsvík

Sunda kommuna fær ikki loyvi at gera rørportur í Haldórsvík - og nú vónar kommunan, at nýggi landsstýrismaðurin í samferðslumálum fer inn í málið.

Í 2023 søkti kommunan um loyvi frá Landsverk um loyvi at gera tvey rørportur í Haldórsvík, fyri at kunna vetrarfriða bygdina. Men Landsverk segði nei.

Landsverk viðhald frá Kærustovninum
Kommunan kærdi avgerðina - men nú hevur Føroya Kærustovnur givið Landsverki viðhald. Orsøkin er millum annað, at rørportur krevja nógv viðlíkahald og kunnu skapa trupulleikar í vetrarhaldinum.

Landsverk vísir eisini á, at arbeiðið seinastu árini hevur verið at minka um talið av rørportum á landsvegum. Tí meta tey ikki, at tað er ein skilagóð loysn í Haldórsvík.

Eyðstein Zachariasen er borgarstjóri í Sunda kommunu, og hann er ikki nøgdur við avgerðina.

Landsverk hevur ikki fleiri viðmerkingar til málið.

Hoyr innslag úr Útvarpstíðindunum.