Stovna felag til undirsjóvartunlar

Fíggjarmálaráðið hevur gjørt eitt lógaruppskot um at stovna eitt partafelag, sum skal byggja og reka undirsjóvartunlar millum Streymoynna og Eysturoynna og Streymoynna og Sandoynna.

Uppskotið var til viðgerðar á landsstýrisfundi hósdagin. 15 milliónir krónur eru í fíggjarlógini fyri 2014 til nýggja partafelagið.

Hetta eru tær seks milliónirnar, sum annars vóru settar av til at fyrireika Skálafjarðartunnilin, fimm milliónir, sum vóru ætlaðar Sandoyartunlinum og so fýra milliónir afturat.

Samgongan og andstøðan hava havt nakrar fundir um tunlarnar nú í desember, men enn er ikki komið á mál, hóast ikki er langt eftir á mál.

Ætlanin er, at landið skal eiga meirilutan í nýggja partafelagnum, og privatir íleggjarar sleppa eisini at seta pengar í.