Biður um pengar til sambýli

Nýtt sambýli til fólk við menningartarni og samansettum avbjóðingum millum annað autismu skal byggjast í Miðvági.

Lógaruppskot um fyrra byggistig kom í løgtingið í gjár.

Fyrra byggistig umfatar dagføring og umvæling við Leitisveg.

Har eru sjey íbúðir.

Tað skal, sambært lógaruppskotinum, kosta í mesta lagi 20,9 mió. kr. 

Bygningarnir, sum skulu umvælast og dagførast, eru 720 fermetrar. 

Ætlanin var at koma í løgtingið við uppskotinum í farna valskeiði.

Kom ikki

Tað var til hoyringar tá.

Men uppskotið kom ikki fyri valið.

Í seinna byggistigi skal byggjast nýtt sambýli við 12 plássum til fólk við sálarligum og sosialum avbjóðingum.

Nýggju sambýlini koma í staðin fyri trý sambýli í Vágum.

Tey eru í trimum sethúsum, sum ikki eru bygd til endamálið.