Ingi skal hjálpa Grønlandi til HM

Ingi Olsen verður á síðulinjuni, tá Grønland hesa vikuna skal spæla ímóti USA, Kanada og Meksiko um pláss í HM-endaspælinum í Týsklandi.

Vestmenningurin er hjálparvenjari hjá grønlendska manslandsliðnum í hondbólti, sum leggur út við dysti ímóti Kanada í dag. Sambært Inga Olsen kann talan verða um lykladyst í royndini at koma í finaluna.

 - Eg vildi mett, at vit eru betur enn Kanada, men tað skal so vísa seg seinni í dag, sigur royndi hondbóltsvenjarin, sum hjálpir høvuðsvenjaranum Johannes Groth.

Liðini spæla fyrst bólkaspæl, og síðan bresta tvey tey fremstu liðini saman í finaluni leygardagin, har HM-plássi stendur upp á spæl. Mett verður, at USA er favorittur til at vinna kappingina.

USA er í gongd við at fyrireika og menna eitt lið til Olympisku leikirnar í Los Angeles í 2028.

Fleiri onnur lond skuldu vera við í kappingini, sum er í Bettendorf, Iowa, t.d. Kuba, Puerto Riko og Dominikalýðveldið, men tey hava øll givið avboð.