Sjúklingahotellið fór aftur í nevnd

Lógaruppskotið um at útvega nýggjan bygning til sjúklingahotellið í Keypmannahavn varð fyrrapartin beint aftur í nevnd.

Málið var annars klárt at avgreiða við 2.viðgerð, eftir at ein samd fíggjarnevnd mælti tinginum til at samtykkja tað.

Men undir 2.viðgerð fyrrapartin bað Helgi Abrahamsen, formaður í fíggjarnevndini, um at fáa málið aftur í nevnd.

Helgi Abrahamsen, sambandsflokkurin, samgongukreppan

Orsøkin er ein orðing í álitinum frá fíggjarnevndini.

Har skrivar fíggjarnevndin soleiðis:

"Undir 1. viðgerð av málinum var møguleikin nevndur at lata føroyska byggivinnu sleppa við í verkætlanina. Og undir viðgerðini í nevndini hevur møguleikin eisini verið umrøddur at byggja eitt sjúklingahotell, sum føroyingar eiga og ikki leiga. Tó tykist áhugin fyri eini slíkari loysn ikki at vera stórur, hvørki hjá føroyska myndugleikanum og ei heldur hjá føroysku byggivinnuni."

Orðingin festi í hjá Ráðgevarafelagnum, sum vísti á at orðingin er bæði skeiv og skaðilig fyri føroyska vinnu.

Helgi Abrahamsen ásannaði í tí sambandi, at talan var um eina knorsluta orðing, ið bygdi á eina misskiljing.

Uppskotið hjá Helga Abrahamsen, um at beina málið aftur í fíggjarnevndina, varð samtykt við 29 atkvøðum fyri og einari ímóti.

Lógaruppskotið kemur væntandi til 2.viðgerð fyrst í næstu viku.