Útlendskir ferðaleiðarar arbeiddu uttan loyvi

Løgreglan fekk í gjár fráboðan um tveir útlendingar, sum arbeiddu ólógliga í Føroyum.

Talan var um tveir ferðaleiðarar, sum arbeiddu í Kalsoynni uttan arbeiðsloyvi.

Løgreglan stóð fyri teimum í Klaksvík, tá teir komu aftur úr Kalsoynni, og handtók teir. Teir hava síðan sitið í varðhaldi.

Sambært útlendingalógini skulu aðrir útlendingar enn norðurlendingar hava arbeiðsloyvi fyri at arbeiða í Føroyum.

Útlendingarnir verða framstillaðir til grundlógaravhoyring í Føroya Rætti í dag klokkan 13, skuldsettir fyri brot á útlendingalógina.

Kringvarpið hevur tosað við ákæran, men hon vil ikki gera nakrar viðmerkingar til málið yvirhøvur í verandi løtu.