Tey bestu í fimleiki heiðrað

Estetiska fimleikaliðið Rósan hjá Støkk var kosið ársins lið á gallaveitslu farna vikuskiftið.

Rósan fór avstað við FM-heitinum og stó seg eisini væl World Cup í París, har tær rukku í finaluna.

Tí var kanska ikki so løgið, at Turið Kruse Steinberg og Linda Knudsen fóru avstað við heiðrinum sum ársins venjaratoymi. Tær báðar hava staðið á odda fyri júst Rósuni  farna kappingarár. 

Lea Sundberg Eliasen úr Ljósinum varð vald til ársins føroyska koreograf. Hon átti millum annað vinnandi FM-seriuna hjá kvinnuunglingunum hjá Ljósinum. 

Mia og Bjarki best við amboðunum

Mia Højgaard og Bjarki Johannesen úr Havnar Fimleikafelag vóru ársins amboðsfimleikarar.

Tey bæði vunnu all around føroyameistaraheitið fyri kortum, men teirra úrslit á altjóða pallinum hava eisini verið góð. 

Tey hava gjørt vart við seg bæði í Norðurlendskum høpi og á oyggjaleikunum á Orknoyggjum.

Camelia Mihaela Mindricel varð kosin besti venjarin í amboðsfimleiki við kvinnum, meðan Bjarki Johannesen, Bjarti Skylv Hansen, Rókur Vestergaard og Djóni Sakarisson var besta venjaratoymið hjá kvinnum.

Havnar Fimleikafelag fleiri heiðrar

Havnar Fimleikafelag fór avstað við fleiri av smærru heiðrunum. Árliga rútmukappingin hjá HF fekk ársins heiður, Rannvá Sólheim úr HF varð kosin til ársins breiddarvenjara og gentuliðið Nova hjá HF áttu ársins drakt.

Isabella Hansen úr Støkk var ársins stjørnuskot.