Fyrstu rognini komin til Skálavíkar

Allarfyrsta veitingin av rognum kom í gjár úr Íslandi og inn á nýggju smoltstøðina hjá Bakkafrosti í Skálavík.

Tað snýr seg um 1,8 milliónir rogn, sum í gjár blivu pakkaði út, sóttreinsaði og løgd inn í rognrúmið á støðini.

Har vera tey liggjandi í umleið tríggjar mánaðar, áðrenn tey vera flutt í størri kør.

Júst hendan veitingin kemur úr Íslandi, har Bakkafrost hevur ein av fleiri føstum veitarum.

Eisini hevur Bakkafrost egin rogn, men tað er neyðugt við ymiskum veitarum, um sjúka skuldi komið í. 

Her heima er hetta størsta av sínum slag, og fer at geva Bakkafrosti áleið 7.5 milliónir smolt aftrat um árið.

Støðin hevur fimm hallir, og smoltini eru í hvørjari eind í tríggjar mánaðar. Tað vil siga, at tað ganga áleið 15 mánaðar til tey fara á sjógv.