Geopark Suðuroy: Gera klárt at søkja eftir starvsfólki

Góð 30 umboð fyri kommunurnar í Suðuroy hava verið til fund í Mentanarhúsinum SALT at umrøða møguleikan at stovna Geopark Suðuroy.

Fundurin endaði við greiðari semju um, at arbeiðast skal víðari við at stovna eina geopark fyri alla oynna. Nú verður farið í gongd við at søkja stuðul og so skjótt sum hann er komin í hús, skulu tvey fólk setast í starv at arbeiða burturav við Geopakini, sigur Lis Mortensen, sum er náttúrulandafrøðingur hjá Jarðfeingi.

Tað var fyrireikingarbólkurin fyri Geopark Suðuroy, sum skipaði fyri fundinum í SALT. Í fyrireikingarbólkinum eru umframt Jarðfeingi, eisini Tjóðsavnið, Visit Faro Islands og stjórin í Mentanarhúsinum SALT, Ólavur Rasmussen.

 Fyrireikingarbólkurin var fyrr í summar, saman við øllum borgarstjórunum í Suðuroy, og vitjaði eina UNESCO Geopark á fyn í Danmark, har fleiri kommunur samstarva um Geoparkina. Í gjár hittust tey so til ein uppfylgjandi fund í Mentanarhúsinum SALT.

Lis Mortensen

Lis Mortensen, náttúrulandafrøðingur á Jarðfeingi, sum er í fyrireikingarbólkinum fyri Geopark Suðuroy.

Á fundinum varð millum annað víst á, at Suðuroy er ein jarðfrøðilig náttúruperla í altjóða samanhangi. Oyggin rúmar søgum um elsta partin av Føroyum og um eldgosini, sum vóru við til at mynda Norðuratlantshavið. Samstundis eru náttúra, lívfrøði, mentanararvur og søga tætt knýtt at hesum landslagnum.

Ein UNESCO Global Geopark byggir á tríggjar hornasteinar: vernd av náttúru- og jarðfrøðiligum virðum, útbúgving og miðlan av vitan, og burðardygga menning við støði í staðbundnum tilfeingi. Endamálið er ikki at friða eitt øki, men at skapa menning og virði við støði í teimum serligu eginleikunum, sum økið hevur. Tað skrivar fyrireikingarbólkurin í tíðindaskrivi.

Hoyr samrøðuna við Lis Mortensen, náttúrulandafrøðing, sum var í tíðindunum.