Íløgufelagið Royndin farið í søguna

Íløgufelagið Royndin, sum LÍV-samtakið eigur, er nú strikað sum partafelag, og harvið endaliga farið í søguna.

Partafelagið Royndin varð stovnað í 2005 fyri at gera íløgu í føroyskt vinnuvirksemi, bæði við avkasti fyri eyga og fyri at stimbra føroyskar fyritøkur at mennast og vaksa.

Við árslok í 2024 vóru nærum allir pengarnir fluttir úr felagnum upp í móðurfelagið LÍV, sum hevði tørv á pengunum fyri at kunna halda sínar eftirlønarskyldur. 

Tilsamans var talan um 49,5 milliónir krónur. 

Globe Tracker

Seinasta íløgan var Globe Tracker

Í tí sambandi segði Jan Jakobsen, stjóri, at Royndin neyvan fór at gera nakra nýggja íløgu fyribils.

Seinasta stóra íløgan hjá Royndini var í felagið Globe Tracker, sum tó higartil ongan vinning hevur givið. 

Tey partabrøvini eru nú flutt upp í móðurfelagið LÍV. 

Sambært roknskapinum hjá Royndini fyri 2025 átti felagið ongar íløguognir við árslok 2025.

Sambært Skrásetingini varð p/f Royndin strikað úr partafelagsskránni 18. juni.