Dregur út at manna Nýskipanarnevndina

Nýskipanarvendin, sum sambært løgmanni skuldi vera sett í seinasta lagi í juni, er ikki mannað enn. 

- Hetta hevur drigið longur út enn væntað, men vit miða eftir, at nevndin er sett í summar, sigur Beinir Johannesen, løgmaður. 

Tað var í mai, at løgmaður boðaði frá, at Nýskipanarnevndin, sum ikki hevur verið virkin, síðani løgtingsvalið var útskrivað, aftur skuldi vera fullmannað í juni.

Fyrr í ár tók Ben Arabo, fyrrverandi formaður í Nýskipanarnevndini, seg úr nevndini, og síðani hevur Súni Selfoss, formaður í Starvsfelagnum, eisini tikið seg úr nevndini. 

Løgmaður heldur fast um, at nevndin skal vera virkin, og tí verður leitað eftir tveimum nevndarlimur aftrat.

Tey fýra, sum manna nevndina eru Marita Rasmussen, Heri á Rógvi, Hjørdis Gaard Lailudóttir og Óluva Klettskarð.