Beinleiðis ruta millum Føroyar og Rotterdam

Í august í ár fer Faroe Ship at hava nýggja beinleiðis rutu millum Føroyar til Rotterdam. 

- Nýggja rutan fer at skapa møguleikar hjá føroyskum útflutningsfyritøkum at fáa sínar vørur til kundarnar á evropeiska meginlandinum beinleiðis úr Føroyum við styttri flutningstíð, skrivar Faroe Ship í tíðindaskrivi.

Faroe Ship metir eisini, at fyri føroyskar innflytarar merkir nýggja rutan styttri flutningstíð, og gevur aðrar innflutningsmøguleikar, enn teir, sum higartil hava verið.

Fráferð av Havnini verður týskvøld, og skipið er í Rotterdam hóskvøld. Komið verður aftur á Havnina mánadag.

Um nakrar vikur verður Ålesund partur av rutuni úr Rotterdam, meðan fráferðin úr Føroyum framhaldandi verður beinleiðis til Rotterdam

Tað verður Skogafoss, sum burturav fer at røkja rutuna, og fyrsta fráferðin av Havnini verður 4. august.