- Eg sakni koyggjuna á Georg Stage

Skúlaskipið Georg Stage hevur mangan vitjað í Føroyum, og nógvir føroyskir næmingar hava siglt við skipinum.

Í dag eru tó alt ov fá ung, sum kenna skúlaskipið. Tað halda Døgg úr Dímun og Polly Olevina Hummeland, ið báðar hava verið næmingar umborð.

Gerandisdagurin á Georg Stage er øðrvísi enn tað, tey flestu eru von við.

Sovið verður í heingikoyggju, tú sleppur í bað triðja hvønn dag, og tú skalt gera eftir boðum frá manningini.

Men tá tú hevur vant teg við lívið umborð, er tað ein fantastisk tilvera, halda tær báðar.

Tú lærir at leggja tín egna tørv til viks.

- Skipið fyrst, er hugburðurin.

Døgg og Polly eru á einum máli um, at tað er ein tíð áðrenn og eftir Georg Stage.

Tú broytist og mennist eftir eitt tílíkt skeið, og hetta áttu fleiri at roynt, eru fyrrverandi næmingarnir samdar um.