Hósvíkar skúli og Hvalvíkar skúli skulu varðveitast

- Barnaskúlarnir í Hósvík og Hvalvík, sum hava fyrsta til triðja flokk, skulu varðveitast.

Tað sigur Eyðstein Zachariasen, borgarstjóri í Sunda kommunu, sum ongar ætlanir hevur um at leggja teir báðar skúlarnar niður, og leggja skúlarnar saman við Skúlanum við Streymin.

Skúlarnir skulu halda fram sum sjálvstøðugir skúlar við egnari leiðslu, sigur borgarstjórin.

Eyðstein Zachariasen

Eyðstein Zachariasen er borgarstjóri í Sunda kommunu.

Undirvísingarstýrið mælir til at leggja skúlar saman

Stjórin í Undirvísingarstýrinum, Hjalmar Hansen, mælir til at leggja smæstu fólkaskúlarnar saman.

Í tíðargrein í Sosialinum í dag mælir stjórin til at avmarka talið á  skúlum til í mesta lagi tjúgu skúlar við í minsta lagi hundrað næmingum. Skúlar fáa betri førleikar við at savna næmingar í størri skúlum, sigur hann.

Hjalmar Hansen

Hjalmar Hansen er stjóri í Undirvísingarstýrinum.

Men sambært Eyðsteini Zachariasen, borgarstjóra í Sunda kommunu, eru fólk í kommununi nøgd við verandi skúlabýgnað við Hósvíkar skúla, Hvalvíkar skúla og Skúlanum við Streymin.

Tað hevur áður verið talan um at leggja skúlarnar í Hósvík og Hvalvík niður og savna skúlagongdina í Skúlanum við Streymin, men eftir at fólk í kommununi tóku støðu í 2016, var niðurstøðan, at skúlarnir báðir skuldu varðveitast.

Skúlin í Hvalvík er nú í ringum standi og skal umvælast í næstum. Avgerðin um at varðveita skúlan stendur við, sigur Eyðstein Zachariasen, borgarstjóri.

Hoyr meira í innslagi í útvarpstíðindunum: