Hearts vil hava Aron Benjaminsen

Skotska felagið Hearts hevur stóran áhuga í føroyska U21-landsliðs- og Víkingaspælaranum, Aron Benjaminsen, og roynir í løtuni at fáa eina avtalu í lag við Víking.

Tað skriva fleiri skotskir miðlar, millum annað Edinburgh News.

Sambært skotskum miðlum er Aron Benjaminsen funnin við hjálp frá Jamestown Analytics, sum arbeiðir við dátugrundaðari spælaraleiting fyri Hearts.

18 ára gamli vongurin hevur skorað níggju mál, og lagt upp til átta mál í 25 dystum fyri Víking í ár. 

Skotskir miðlar skriva, at Aron Benjaminsen verður mettur sum eitt av størstu ungu talentum í føroyskum fótbólti, og onnur útlendsk feløg hava eisini víst honum áhuga, men Hearts verður tó mett at vera favorittur at fáa undirskriftina hjá Aroni. 

Steypafinalan kann órógva
Skotska flytingarvindeygað letur aftur hósdagin 3. september klokkan 17, og Víkingur vil, sambært Edinburgh News, fegin hava Aron Benjaminsen tøkan til steypafinaluna móti KÍ tann 5. september. Men skal hann til Hearts, so má flytingin avgreiðast áðrenn skotsku freistina.

Aron Benjaminsen hevur sáttmála við Víking í tvey ár afturat, og Hearts sær føroyska spælaran sum eina íløgu, ið kann mennast í skotskum fótbólti og seinni hava stórt virði fyri felagið, skrivar Edinburgh News.