Árni takkar fyri seg á landsliðnum

Árni Frederiksberg hevur gjørt av at takka fyri seg á føroyska fótbóltslandsliðnum. 

 - Eg havi leingi stríðst við tankan, um eg skuldi fara í holt við eina nýggja Nations League-kapping ella ikki. Ætlanin hevur allatíðina verið at taka eitt ár afturat, men seinasta tíðin í fótbóltinum hevur fingið meg at hugsa øðrvísi, sigur mivallarin sambært fsf.fo.

 - Vit skulu vera foreldur aftur um hálvan oktober. Samstundis havi eg smávegis skaðar at dragast við, og harumframt fyllir arbeiðið nógv. Tí haldi eg tíðin er komin at takka fyri meg á landsliðnum.

Árni Frederiksberg spældi sínar fyrstu landsdystir frá 2014 til 2019, men var síðan ikki við í fleiri ár. Tá Eyðun Klakstein tók við venjarastarvinum, eydnaðist at fáa Árna Frederiksberg við aftur, og KÍ-vongurin hevði eitt frálíkt ár í søguliga góðari HM-undankapping.

 - Landsliðsárið í fjør var heilt fantastiskt. Tað var deiligt at vera við aftur, og eg vil takka venjaratoyminum fyri, at teir góvu mær møguleikan, sigur Árni Frederiksberg við heimasíðuna hjá FSF.

Næsti dystur hjá manslandsliðnum verður á Tórsvølli um smáar tvær vikur, leygardagin 26. septembur, tá Kasakstan kemur á vitjan í UEFA Nations League.

Hópurin til komandi landsliðsuppgávur verður kunngjørdur í morgin, mánadagin 14. septembur klokkan 10:00.