Gjaldskortini verða nógv brúkt, hóast keypiorkan minkar

Hagtølini um gjaldskort vísa, at nýtslan fyrra hálvár í ár var eins stór - og viðhvørt størri - enn í fyrra hálvár í fjør.

Størri inflatión og hægri rentur gera annars, at keypiorkan hjá húsarhaldunum minkar. 

Ein minkað keypiorka kann tó fara at tálma nýtsluni komandi tíðina, sigur Váðaráðið, sum hevði sín 35. fund mánadagin.

Virksemið í føroyska búskapinum er framvegis stórt, sigur ráðið. 

Eingin váði

Lítið arbeiðsloysi og hækkandi bústaðarprísir eyðkenna búskapin.

Váðaráðið sær tó ikki greið tekin um, at systemiskir váðar eru í ferð við at taka seg upp í føroyska peningastovnsgeiranum.

Systemiskir váðar eru veikleikar ella ójavnvág í fíggjargeiranum, sum í ringasta føri kunnu elva til kreppu. 

Ein váði er systemiskur, um hann kann væntast at raka allan fíggjargeiran, ella týðandi part av honum.