Samanhaldið rungaði í Norðurlandahúsinum 

Í kvøld varð arktiska tónleikakappingin Pan-ArcticVision fyri fyrstu ferð hildin í Føroyum. Tónleikarar úr økjum tvørtur um Arktis komu saman í Norðurlandahúsinum við hvør sínum máli, tónleiki og søgum úr heimstaðnum. 

Luttakararnir hava verið nógv saman seinastu dagarnar, og tað sást aftur á pallinum. Stór smíl, long eygabrá, kórsangur og hjálpandi hendur, gjørdi eina sterka ábending um, at tónleikurin longu hevði ført tey nærri hvør øðrum. 

At skapa sambond millum fólk og listafólk í arktisku økjunum er eitt av endamálunum við Pan-ArcticVision. Hetta sást serliga í felagsframførsluni, har luttakararnir hvør í sínum lagi høvdu tónleik úr síni mentan við sær.  

pan_arctic_vision, Marius DC

Marius DC umboðaði Føroyar í Pan-ArcticVision og tók virknan lut í felagsframførsluni
 

Tríggir ymiskir vinnarar 

Í Pan-ArcticVision verða tríggir ymiskir heiðrar latnir. 

Orkumikli ungdómurin í íslendska bólkinum Falinn Gjóður hevði boð um kollvelting við sær á pallin og vann heiðurin fyri mest kollveltandi sangin. 

Piunguałaq og Tooma úr Nunavut framførdu í siðbundnum búna við vøkrum sangi. Tey vunnu heiðurin fyri sangin, sum gav sterkastu kensluna av felagsskapi og samanhaldi. 

Nuunu úr Kalaallit Nunaat fekk íblástur til sang sín úr gomlu ræðusøgnini um kvinnuna Erlaveersiniooq. Hon vann heiðurin fyri mest arktiska sangin.

Næsta Pan-ArcticVision verður í Reykjavík.