SEV: Alt netið verður grivið niður um átta ár

El-linjurnar uttan fyri Havnina, sum fingu skaða í ódnini beint fyri jól, verða í næstum grivnar niður. Linjurnar, sum slitnaðu, tá tekjan reiv á Vinnuháskúlanum í Havn, vórðu umvældar, men tær verða í næstum grivnar niður, nú Sev ger eina vindmyllulund í Húshaga oman fyri Havnina.   

Nýggja vindmyllulundin verður bygd saman við eini koplingarstøð í Húsahaga, og tað er í tí sambandi, at  eitt strekki av netinum verður lagt í kaðal millum koplingarstøðina í Húshaga, Sundsverkið og koplingarstøðina í Varðagøtu í Havn.

Sambært Sev minkar talið av streymslitum, so hvørt el-linjurnar, sum fyrr hingu høgt uppi, verða grivnar niður. 

Eftir jólaódnina í 1988 fór Sev at leggja háspenningarlinjur í kaðalar. Umleið 75 prosent av netinum liggur nú undir jørð, og ætlanin hjá Sev er, at alt netið skal verða grivið niður um átta ár.