Føroyar fáa norrønt ungmannafelag

- Øll hini Norðurlondini hava eitt norrønt ungmannafelag, so tað er upp á tíðina, at vit í Føroyum eisini fáa eitt.

Soleiðis sigur Laura Kathrine Apol, ið er ein av stigtakarunum til at seta eitt nýtt føroyskt ungmannafelag á stovn. Felagið, ið hevur fingið heitið Norrøna Ungmannafelag Føroya, ella NUF, er eitt politiskt óheft felag, ið fer at samstarva við hini ungmannafeløgunum í Norðurlondum. Danmark, Norra, Svøríki, Ísland, Grønland og Finnland hava longu eitt norrønt ungmannafelag, og í Álandi er eitt á veg. Soleiðis verður NUF partur av einum breiðum samstarvi landanna millum, ið skal virka til frama fyri at styrkja bondini millum ungdómin í londunum og kunna um mentan og viðurskifti hjá okkara grannum.

- Vit leggja dent á at deila norðurlendska mentan, samfeløg, søgu, mál og náttúru, eins væl og at skipa fyri ymsum norðulendskum tiltøkum, bæði í Føroyum og í hinum Norðurlondunum. Tiltøkini kunnu snúgva seg um at uppliva ella læra um alt frá heitum keldum í Íslandi, svenskum metaltónleiki, norskum fjøllum, finskari sauna, at fara við hundasletu kring innlandsísin í Grønlandi ella um ymisk sløg av mati. Eins og vit fara at verða upplýst um onnur Norðurlond, vilja okkara systirfeløg eisini læra um, hvussu tað er at vera ungur í Føroyum.

NUF verður ein partur av Föreningarna Nordens Ungdomsförbund (FNUF), ið er ein samstarvsfelagsskapur fyri øll ungmannafeløgini í Norðurlondunum. FNUF skipar fyri ymsum tiltøkum, sum NUF sleppur at luttaka á, og hóast NUF verður ein politiskt óheftur felagsskapur, verður eisini møguligt at luttaka á tiltøkum, sum Ungdomens Nordiska Råd skipar fyri.

Laura Kathrine Apol heitir á øll ung, ið eru áhugað í norðurlendskari ungdómsmentan, og sum hava hug at læra og uppliva nýggj spennandi ting, um at gerast partur av NUF. Felagið fer í februar at hava stovnandi aðalfund, har eisini nevnd verður vald. Til ta tíð er møguligt at fylgja við á facebook síðuni hjá NUF, har tiltøk og onnur kunning verða fráboðað.

- Kom við, lær og uppliva nakað nýtt.