Vetrarkappingin: Julian rann og vann aftur

Julian Gregersen úr Treysti og Bjørk Herup Olsen úr Bragdinum vunnu, tá annað umfar í vetrarkappingini var í góðveðrinum á Sandi um vikuskiftið.

Klaksvíkingurin var við aftur eftir skaðasteðg, og hann fór avstað við gullinum í fyrstu royndini frammanfyri Rógva Kárason og Torbjørn Hentze úr Bragdinum.

Julian Gregersen rann teir knøppu níggju kilometrarnar upp á  28:27,1 - eini 40 sekund frammanfyri Rógva Kárason, sum vann Kerjarenningina, sum var fyrsta umfar av vetrarkappingini.

Hjá kvinnum var Bjørk Herup Olsen úr Bragdinum suveren við tíðini 35:09,0. Valborg Heinesen, sum endaði á 2. plássi seinast, var ikki við hesa ferð. Í staðin endaði unga Elia Mouritsen nummar tvey.

Lokala rennifelagið Tindar skipaði fyri kappingini saman við Bragdinum.